علي أي أساس الأهلي و الزمالك بيختاروا صفقاتهم ؟

في أخر 5 سنين ، الأهلي و الزمالك لوحدهم بيتعاقدوا مع لاعيبة كتير و شئ الملفت للنظر إن كتير منهم بيتباعوا أو يطلعوا إعارة السنة الي بعدها بالرغم انهم جايين بأرقام كبيرة، طب ليه بيحصل كدة ..

أولاً .. مدي تأثير الإعلام و المعلقين و الوسط الرياضي بشكل عام في زيادة سعر اللاعب و فرضه كلاعب متميز علي الساحة و لازم يروح أهلي و زمالك فا بضعط من الجمهور و تأثير السوشيال ميديا ، بيتم توجيه إدارات الأهلي و الزمالك للتعاقد مع اللاعب ده و بالسعر الكبير الي معروض من ناديه ..

و ده هيودينا للجزء التاني من الموضوع و هو متخذي القرار في الأندية تحت أي مسمى بقي سواء كانت لجنة فنية ، لجنة تخطيط أو لجنة تعاقدات أو غيرها من الأسامي ..

اللجنة دي مفروض هي المسؤولة عن التفاوض مع اللاعب و الوصول لسعر مناسب مع ناديه ، لكن هل دائماً بيكون السعر مناسب ؟

و السعر الي بيتباع بيه اللاعب هل يستحقه فعلاً و يعبر عن قيمته التسويقية ولا مجرد ذكاء من النادي التاني الي بيعرف يسّوق اللاعب بتاعه و النادي الكبير بيدفع و خلاص طالما عايز اللاعيب بأي طريقة بعد ضغط الجمهور و السوشيال ميديا !

اللاعب ده ممكن يكون ميستحقش المبلغ الكبير الي بيتدفع فيه خصوصاً إنه ف أغلب الوقت ، بيتباع بعدها بسنة أو سنتين كتير ببلاش من غير تأثير واضح مع الفريق ..

ليه مفيش عين تحكم هل اللاعب ده جيد و يستحق ولا لا ؟

غياب العين دي في الأندية الكبيرة سهلت علي السوشيال الميديا و الإعلام إنهم يوجهوا الأندية للتعاقد مع أي لاعيب لمجرد كام جول حلو أو مهارة و يشتروه بأعلي سعر ، عشان تكون الإدارة قدام الجمهور عملت الي عليها و اتعاقدت مع اللاعب الي هما عايزينه بغض النظر الفرقة محتاجاه ولا لا ..

لازم يبقي فيه نظام يتم علي أساسه إختيار اللاعب قبل التعاقد معاه طالما هيتدفع فيه فلوس كبيرة أو ممكن لتفادي فشل الصفقة ، ممكن الفريق يتعاقد مع اللاعب عن طريق الإعارة و في حال تألقه و انسجامه مع الفريق، ساعتها ممكن الإدارة تفّعل بند شراء اللاعب من ناديه بشكل نهائي ..