حكاية فريق ال Galacticos في ريال مدريد

في سنة ٢٠٠٠ ، فلورنتينو بيريز كان مرشح نفسه في انتخابات نادي ريال مدريد علي منصب الرئيس و صفقة لويس فيجو كانت جزء من حملته الإنتخابية لما وعد جمهور الريال بالتعاقد مع فيجو مقابل دفع قيمة الشرط الجزائي في عقد اللاعب مع برشلونة في حال فوزه برئاسة النادي

فيجو كان من واحد من أحسن لاعبي العالم و كان لسه مشارك في بطولة اليورو ٢٠٠٠ و ساهم مع المنتخب الإسباني في الوصول لنص النهائي ..

إتفاق بيريز مع فيجو كان إنه لو نجح في الانتخابات هيدفع قيمة الشرط الجزائي في عقده و يتعاقد معاه أو دفع ٢٦ مليون يورو لو فيجو خالف الاتفاق .. 

و فعلاً بيريز فاز بالانتخابات و دفع ٦٢ مليون يورو للتعاقد مع لويس فيجو ك أولي صفقات بيريز في طريقه لإعادة إنشاء فريق ال Galacticos فريق نجوم العالم من خلال إنه يتعاقد مع نجم في كل موسم 

و عشان يوفر الأموال اللازمة للصفقات ، باع بيريز ملعب تدريب النادي Ciudad Deportiva ، مقابل ٤٨٠ مليون يورو ، و الي ساعد الريال بتصفية الديون الي عليه وبناء مجمع تدريب بديل بجزء بسيط من التكلفة و كمان التعاقد مع لاعيبة مهمين ..

و فعلاً الموسم الي بعده تعاقد مع زين الدين زيدان من يوفنتوس مقابل ٧٥ مليون يورو في صفقة قياسية في تاريخ النادي 

زيدان كان فاز بكأس العالم و اليورو لكنه كان عايز يحقق دوري أبطال أوروبا، البطولة الي وصل فيها قبل كدة للنهائي مع يوفنتوس لكن خسر من ريال مدريد سنة ٩٨ ، فا اختار يلعب للريال بعد ما بيريز وصفه بأنه لاعب اتولد عشان يلعب لريال مدريد

ريال مدريد في الفترة دي توج بالدوري الاسباني في ٢٠٠١ و ٢٠٠٢ ، و كمان اتحقق حلم زيدان بالحصول على دوري أبطال أوروبا في ٢٠٠١-٢٠٠٢ لما زيدان سجل هدف الفوز في النهائي ضد باير ليفركوزن

بعد كدة ، ريال مدريد أشتري المهاجم البرازيلي رونالدو لاعب إنتر ميلان مقابل ٤٥ مليون و في أول يوم بعد إعلان الصفقة .. مبيعات تيشرتات رونالدو كلها اتباعت في نفس اليوم ..

و مع أول مباراة لرونالدو مع الريال كانت قدام نادي الافيس و كان بديل و نزل و سجل هدفين منهم هدف سجله بعد ما نزل ب ٦١ ثانية في بداية أسطورية لظاهرة كرة القدم مع ريال مدريد

و كمان تعاقدوا مع لاعب الوسط الإنجليزي ديفيد بيكهام من مانشستر يونايتد مقابل ٣٥ مليون يورو لأسباب تسويقية و بسبب الصفقة دي اكتسب ريال مدريد إعلانات كبيرة علي مستوي العالم و خصوصاً في آسيا. 

بيريز بردو كان عايز يتعاقد مع فرانشيسكو توتي لاعب روما لكنه رفض ..حاول كمان ريال مدريد يتعاقد مع باتريك فييرا من آرسنال سنة 2004 ، لكن الصفقة محصلتش و بشكل عام ملامح فريق ال جلاكتيكوس بدأت تبان بعد ما كان كاسياس في حراسة المرمي و في الدفاع روبرتو كارلوس و في النص دافيد بيكهام ، زيدان و لويس فيجو و في الهجوم راؤول و البرازيلي رونالدو 

و على الرغم من كل الصفقات المهمة دي، فشل الفريق في الإستمرار في هيمنته علي المسابقات المحلية أو الأوروبية في ال ٣ سنين الي بعدها 

فا بعد رحيل المدرب فيسنتي ديل بوسكي عن تدريب ريال مدريد و ، الي كان كسب مع الفريق بطولتين من دوري أبطال أوروبا ، و الدوري في موسم ٢٠٠٢-٢٠٠٣ ..

بيريز عين البرتغالي كارلوس كيروش مدرب للفريق الي كان مساعد للسير أليكس فيرجسون في مانشستر يونايتد ، لكنه مشي علي طول بعدها في موسم ٢٠٠٣-٢٠٠٤ ، بعد فوزه ببطولة واحدة و كانت السوبر الإسباني

و بالرغم من إن عقد المهاجم الكاميروني صامويل إيتو مع ريال مايوركا كان فيه بند يسمح للريال بعودة اللاعب لو طلبوه لكن بيريز شاف إن الفريق مش محتاجه خصوصاً مع رونالدو الظاهرة و راؤول و حتي بعد التعاقد مع مايكل أوين لكن أوين الي كان جي كبديل لصفقة إيتو ، مشي هو كمان بعدها بموسم  

زين الدين زيدان كمان اعتزل في ٢٠٠٦ ، و قبلها لويس فيجو مشي في ٢٠٠٥ ، و بيكهام و رونالدو مشيوا في ٢٠٠٧ عشان الفريق الي اتجمع للفوز بالبطولات و السيطرة علي العالم ، في اقل من ٣ سنين فشل في تحقيق بطولات كبيرة ..

فشل الفريق ناس كتير شافت إن جزء منه كان بسبب تجاهل الصفقات الدفاعية و كمان السماح للاعب خط الوسط كلود ماكيليلي بالرحيل عن الفريق لما رفض النادي يزود مرتبه بالرغم من أنه كان ساعتها واحد من أفضل لاعيبة خط الوسط الدفاعيين في العالم

بالإضافة كمان لرحيل المدرب فيسنتي ديل بوسكي عن قيادة الفريق من غير أسباب واضحة و ده اثر بشكل سلبي علي الفريق حسب كلام المدافع الإسباني ايفان هيلجويرا لاعب ريال مدريد ساعتها الي قال إن لما الإدارة كانت عايزة تمشي ديل بوسكي، كنا احنا كلاعيبة عايزينه يكمل و معجبناش الطريقة الي مشي بيها من النادي و حتي قال إنهم مكنوش عايزين يحضروا إحتفال التتويج بالدوري كنوع من التمرد على الإدارة بعد قرار الإستغناء عن ديل بوسكي لكنهم في النهاية أُجبروا إنهم يحضروا

و بشكل عام اتكلم هيلجويرا كمان إن توالي المدربين بعد ديل بوسكي أدي بالفريق لحالة من عدم الاستقرار و عدم التحكم في غرفة الملابس ..

عشان في النهاية فريق ال Galacticos ينتهي بدون نجاح يذكر كانها رسالة لأي فريق عايز يجمع نجوم العالم عشان يحقق إنجازات كبيرة ، إن نجاح التجربة مش مضمون ..