حكايات المونديال ( الجزء الأول )

 ١- حكاية تأسيس كأس العالم و الفكرة جت ازاي ؟

الفكرة بدأت في ١٩٠٤ لما حصل إجتماع للفيفا بحضور دول أوروبية كتير زي إسبانيا و هولندا و غيرهم .. و الفيفا كان عنده اقتراح إقامة بطولة عالمية بتضم المنتخبات في الكرة .. لكن الموضوع طول شوية بسبب رفض اللجنة الأولمبية فكرة كأس العالم عشان مياثرش علي الأولمبياد فا الفكرة وقفت بشكل مؤقت

في ١٩٢١ ، الفكرة رجعت تاني عن طريق المحامي جول ريميه الي سعي بكل الطرق إن كأس العالم يتعمل و فعلاً الفيفا عملوا إجتماع في ٢٥ مايو ١٩٢٨ و وافقوا علي إقامة بطولة كأس العالم و ساعتها كانوا مسمينها كأس النصر

الأوروغواي كانت أول دولة تقدم طلب استضافة البطولة و الفيفا وافقت بسبب ان الأوروغواي ساعتها كانت من أكبر الفرق في الكرة بعد ما فازت بآخر بطولتين لل أولمبياد و فعلاً أول نسخة للبطولة اتعملت في ١٩٣٠ في الأوروغواي الي بردو فازت بيها الأوروغواي 

٢ - أرقام قياسية في تاريخ كأس العالم 

أ- بطولة كأس العالم اتوقفت بسبب الحرب العالمية التانية لحد ١٩٥٠ و رجعت تاني و كانت بتتلعب في البرازيل .. الاورغواي فازت باللقب بالفوز البرازيل في النهائي الي اتلعب علي ملعب الماراكانا و وصل عدد الحضور ل ٢٠٠ الف متفرج تقريباً قي رقم قياسي كبير 

ب- في كأس العالم ١٩٥٤ في سويسرا ، شهدت البطولة أعلي معدل تهديفي في تاريخ البطولة ب ٥.٣ هدف في المباراة الواحدة

ج- في كأس العالم ١٩٩٤ في أمريكا، عدد الجماهير التي حضرت كل مباريات البطولة وصل ل 3.6 مليون متفرج في رقم قياسي كبير

د- في كأس العالم 2006، الي اتلعب في ألمانيا، وصل عدد الي تابعوا المباراة النهائية ل 715 مليون شخص تقريباً حسب ويكيبيديا

٣- قوانين جديدة في الكرة بعد كأس العالم ١٩٩٠

بطولة كأس العالم ١٩٩٠ الي اتلعبت في إيطاليا و فاز بيها منتخب ألمانيا ، ناس كتير كانت شايفة البطولة دي من أكتر النسخ ل كأس العالم ملل و ده كان عشان قلة الأهداف بشكل كبير بالإضافة لكثرة البطاقات الحمراء و تضييع الوقت فا بناءاً علي كدة الفيفا بعد كأس العالم ٩٠ خدت قرارات كتير غيرت في شكل الكرة لحد دلوقتي

القرارات دي منها إن الفوز في مباراة في دور المجموعات بقي ب ٣ نقاط مش بنقطتين زي قبل كدة و كمان ممنوع ان مدافع لو قاصد يرجع الكرة للحارس ، ممنوع الحارس يمسكها بايده

٤- قوانين جديدة في كأس العالم ٢٠١٤ 

الي اتلعب في البرازيل لما الفيفا قرر إن لاعبيبة الفرقتين في المباراة يسلموا علي بعض و علي الحكام في بداية المباراة و كمان استخدمت تقنية خط المرمي لأول مرة في تاريخ كأس العالم بعد نجاحها في كأس القارات ٢٠١٣ و كمان كأس العالم ٢٠١٤ شهد استخدام ال Spray من الحكام للمرة الأولى في تاريخ كأس العالم و الي بيساعد الحكام في تحديد مكان الكرة و مكان وقوف اللاعيبة في الحيطة لما المنافس يلعب ركلة حرة

٥-تعديل علي قوانين الكرة 

في كأس العالم ١٩٧٠ ، تم السماح للمنتخبات باجراء تبديلين في المباراة لأول مرة في تاريه البطولة و كمان الموافقة علي ان الحكام تطلع للاعيبة الكارت الاصفر و الاحمر بعد ما كانت شفهية

في كأس العالم ١٩٧٤ ، أول بطاقة طرد في تاريه كأس العالم كانت للاعب من منتخب تشيلي و أول إنذار كان للاعب المنتخب السوفيتي في مباراة ضد المكسيك

في كأس العالم 2002 قرر الفيفا أن القائمة الرسمية لكل منتخب في البطولة تبقي ٢٣ لاعب منهم ٣ حراس مرمي

و في كأس العالم 2018، تم استخدام لتقنية الفيديو ال (VAR) لأول مرة في تاريخ بطولات كأس العالم

٦- إحصائيات و أرقام مهمة في كأس العالم

علي مدار ٢٠ نسخة لكأس العالم ، فاز بيها ٨ منتخبات بس ٥ من قارة أوروبا و ٣ من أمريكا الجنوبية و البرازيل هو البلد صاحب العدد الأكبر من الفوز باللقب ب ٥ مرات بعديه ايطاليا و ألمانيا هما الاتنين ٤ مرات ..

البرازيل هو أكتر منتخب سجل أهداف في تاريخ البطولة ب ٢٢٩ هدف و ألمانيا صاحب الرقم القياسي في اكتر عدد أهداف في نسخة واحدة ب ٢٥ هدف في ١٩٥٤

أكبر فوز في مباراة في كأس العالم كان لمنتخب المجر ضد السلفادور ١٠-١ في ١٩٨٢ و كمان في نفس المباراة لاعب من المجر سجل أسرع هاتريك في تاريخ كأس العالم في ٨ دقائق بس 

الهداف التاريخي للبطولة هو ميروسلاف كلوزة ب ١٦ هدف و بعديه رونالدو الظاهرة ب ١٥ هدف 

البرازيلي بيليه هو أكتر لاعب يفوز باللقب ب ٣ مرات و كمان أصغر لاعب يفوز ببطولة و هو ١٧ سنة في ١٩٥٨

٧- تاريخ المشاركات العربية في كأس العالم

منتخب مصر كان أول فريق عربي يشارك في المونديال في ١٩٣٤ .. منتخب تونس كان صاحب أول فوز لفريق عربي لما فاز علي المكسيك ٣-١ في ١٩٧٨ و المغرب أول فريق يتأهل للدور التاني في ١٩٨٦ و بعديه الجزائر و السعودية اتاهلوا كمان لدور ال ١٦ في ١٩٩٤ و ٢٠١٤ بالترتيب .. 

المغرب ، السعودية و تونس أكتر فرق شاركت في البطولة ب ٥ مرات و بعديهم الجزائر ٤ و مصر ٣ ..

سامي الجابر أكتر لاعب عربي شارك في كأس العالم ب ٤ مباريات و بعديه الحارس محمد الدعيع ب ٣ ، و سامي الجابر كمان هداف العرب في المونديال ب ٣ أهداف ده غير إنه أول لاعب عربي يلعب في ٤ بطولات متتالية من كأس العالم

٨- مشاركة نادي نابولي في كأس العالم

كان فيه مباراة بين منتخب ألمانيا و النمسا لتحديد المركز الثالث في كأس العالم 1934 و اتلعبت علي ملعب نابولي في إيطاليا

المنتخبات ساعتها مكنش ليها كذا زي , كان هو الطقم الاساسي و بس فا الطريف في المباراة دي ان المانيا و النمسا الاتنين بيلبسوا نفس اللبس تيشيرت ابيض و شورت اسود و ده الي صعب التفريق بين لاعيبة الفرقتين

الحكم عمل قرعة قبل بداية المباراة لاختيار الفريق الي لازم يغير الطقم بتاعه فا كان النمسا الي مكنش عارف هيعمل ايه لحد ما للمسؤولين في نادي نابولي خدوا موافقة رئيس النادي علي ان لاعيبة النمسا تلبس تيشيرت نابولي في المباراة دي عشان يكون نابولي النادي الوحيد في التاريخ الي يشارك في كأس العالم و اتلعبت المباراة و ألمانيا فازت علي النمسا ٣/٢

٩- ٤ من أقوي الأداءات الفردية في كأس العالم 

الظاهرة رونالدو سجل هدفين في نهائي ٢٠٠٢ ضد ألمانيا الي حسموا التتويج بكأس العالم للبرازيل للمرة الخامسة في تاريخه بعد أداء فردي كبير من رونالدو

زيدان صنع هدف فوز فريقه ضد البرازيل في ربع نهائي ٢٠٠٦ الي سجلوا هنري لكن غير الهدف زيدان لعب مباراة كبيرة ضد نجوم البرازيل و أفضل وصف اتقال علي أداؤه في المباراة دي إن زيدان كان بيلاعب البرازيل لوحده

إنييستا عمل مباراة تاريخية في نهائي ٢٠١٠ ضد هولندا و توج أداءه بتسجيل هدف فوز إسبانيا بالبطولة في الدقيقة ١١٦

كريستيانو سجل هدف في بداية مباراة البرتغال ضد اسبانيا في ٢٠١٨ قبل ما إسبانيا يتعادلوا لكن كريستيانو يسجل التاني و بردو إسبانيا تتعادل و كمان يسجلوا التالت و يتقدموا علي البرتغال قبل ما كريستيانو يكمل أداؤه الكبير و يسجل الهدف التالت للبرتغال و هاتريك تاريخي لكريستيانو في كأس العالم