الإنجاز الكبير الي منتخب المغرب عمله في كأس العالم ٢٠٢٢ في قطر لازم يكون درس لكل البلاد العربية إن عندنا مواهب في كرة القدم لا تقل عن اللاعيبة الأوروبيين لكن محتاجين إهتمام و مواكبة التطور و تغيير العقلية من إن أقصي طموحنا نشارك في كأس العالم ل ليه لأ مش ممكن ننافس كمان علي مركز متقدم ؟
و ده الي المغرب عمله و إنه غير مفهوم التمثيل المشرف للفريق العربي و رفع سقق الطموحات لكن ده مش بسهولة ده نتاج شغل و مجهود كبير للوصول للمكانة دي .. و بالنسبة للكرة المصرية مهم جداً تطوير المنظومة الرياضية ككل في مصر للعودة للمسار الصحيح .. في المقال ده هنناقش أهم النقاط المهمة لتطوير الكرة في مصر ..
التعاقد مع حكام أجانب للتحكيم في الدوري المصري لفترة معينة يعتبر أولوية و كمان في خلال الفترة دي يتم تحضير حكام مصريين صغار في السن عن طريق إنهم يستفيدوا من الحكام الأجانب و كمان الحكام الأجانب يعملوا محاضرات و دورات تدريبية ينقلوا خبراتهم للحكام المصريين
زيادة قاعدة المحترفين في الخارج يعني أي لاعب يجيله عرض أوروبي حتي لو بمقابل مادي بسيط ، ناديه يوافق عليه طالما مش محتاجه و حتي لو محتاجه بس بسعر مناسب فا يوافق علي خروج اللاعب للإحتراف
بالإضافة كمان لعقد إتفاقيات مع دول أوروبية لتسويق اللاعيبة المصريين في الخارج و بشكل خاص الناشئين في سن صغير و زي ما الأهلي عامل مع دولة التشيك ، مهم ده ينتشر علي نطاق أكبر و مع دول أكتر لفتح خطوط بينا و بين الدول الأوروبية لإحتراف اللاعيبة و المساعدة في تأسيس اللاعب المصري في سن صغير
كمان تقليل عدد الفرق في الدوري المصري ل ١٦ أو كمان ١٤ فريق لزيادة قوة التنافس في الدوري و النادي الي يصعد من الدرجة الثانية و الموسم الي بعده هبط تاني ، يتمنع من المشاركة في الدوري الممتاز لمدة موسمين علي الأقل
رفع إيرادات الأندية الصاعدة للدوري الممتاز شئ مهم جداً بالإضافة لتوزيع حقوق البث و الإعلانات بشكل عادل بين الأندية مع زيادة سعة دخول الجماهير للملاعب لزيادة ربح الأندية من شراء الجمهور للتذاكر
و كمان تطوير كاميرات إذاعة الدوري لإنتشار المسابقة خارجياً و عشان يساهم في زيادة فرصة إحتراف اللاعبين في أوروبا من خلال توفير صورة كويسة الأندية الأوروبية تقدر تتابعهم من خلالها
إختيار رجل المباراة و أفضل لاعب في الجولة و بعد نهاية كل شهر إختيار أفضل لاعب ، مدرب و أفضل هدف و نفس الكلام في نهاية الموسم يتم إختيار الأفضل علي كل الأصعدة في الموسم ، دي حاجات تبان صغيرة لكنها بتفرق في قيمة الدوري التسويقية و متابعة الجمهور للدوري بشكل منتظم و قوي
تعليقات
إرسال تعليق
اترك تعليقك