ليونيل سكالوني ..

 بعد خروج الأرجنتين من دور ال ١٦ في كأس العالم ٢٠١٨ ضد فرنسا ، تم تعيين المدرب الشاب ليونيل سكالوني مدرب للمنتخب .. كانت خطوة مش سهلة لكن الإتحاد الأرجنتيني قرر ياخد ال Risk في مدرب صغير لكنه مجتهد في شغله و طموح جداً لكن قبل الكلام عن سكالوني المدرب محتاجين نتعرف الأول علي سكالوني اللاعب

لو نرجع بالزمن لورا فا سكالوني كان بيلعب باك رايت و بدأ مشواره الكروي كلاعب في الدوري الارجنتيني مع نيولز اولد بويز و استودينانتس قبل ما يسافر إسبانيا و ينضم لنادي ديبورتيفو لا كورونيا في ١٩٩٧ مقابل ٢ مليون و ٤٠٠ الف .. 

لعب سكالوني مع ديبورتيفو ٢٧٥ مباراة علي مر ٨ سنين سجل فيهم ١٨ هدف و صنع ٣ و فاز ب ٤ القاب دوري و كأس و ٢ سوبر إسباني، و دي كانت التجربة الأنجح في مشوار سكالوني كلاعب كرة ..

لكنه في يناير ٢٠٠٦ طلع إعارة لنادي ويست هام عشان يشارك أكتر و يزود فرصته في المشاركة مع الأرجنتين في كأس العالم ٢٠٠٦ .. و لعب معاهم و وصل مع الفريق لنهائي ال FA Cup ضد ليفربول ..

سكالوني بعدها رجع إسبانيا لكن لنادي راسينج سانتاندير في صفقة انتقال حر و لعب معاهم موسم واحد قبل ما يروح إيطاليا و نادي لاتسيو و منه إعارة تاني لنادي ريال مايوركا و بعدها لاتالانتا الإيطالي يعتزل في ٢٠١٥

سكالوني مع الأندية لعب ٤٤٢ مباراة سجل ٢٠ هدف و صنع ٨ و علي المستوي الدولي ، لعب مع منتخب الارجنتين ٧ مباريات بس و سجل هدف منهم هدف و شارك في كأس العالم ٢٠٠٦ بدل خافيير زانيتي و لعب مباراة واحدة بس قي كأس العالم كانت ضد المكسيك في دور ال ١٦

سكالوني اتعين مساعد لجورجي سامباولي في نادي إشبيلية الإسباني في اكتوبر ٢٠١٦ لكن بعدها بسنة تقريباً سامباولي بيتولي تدريب منتخب الأرجنتين و سكالوني يكمل معاه في الجهاز الفني .. 

لعب الأرجنتين تحت قيادة سامباولي و مساعده سكالوني بطولة كأس العالم ٢٠١٨ في روسيا لكنهم خرجوا من دور ال ١٦ عشان بعدها سامباولي يمشي و البديل يكون مساعده الشاب ليونيل سكالوني بشكل مؤقت للفريق .. لكن بعدها في نوفمبر يتم إعلان استمرار سكالوني بشكل دائم .. 

سكالوني بدأ مشواره التدريبي مع الأرجنتين في بطولة كوبا أمريكا ٢٠١٩ و ساعتها الفريق وصل نص النهائي و فاز بالمركز الثالث بعد الخسارة من البرازيل صاحب الأرض في نص النهائي لكنه فاز بالميدالية البرونزية بعد الفوز علي تشيلي ..

بداية مش قوية لكنها مش سيئة بعد الفوز بميدالية في الكوبا أمريكا و الخسارة من البرازيل الفريق الي كسب البطولة ساعتها ، لكن البطولة دي كانت استعداد لبناء جيل قوي و فرصة لتجربة أفكار سكالوني مع اللاعيبة الجديدة الي ضمها للقائمة مكان لاعيبة خلاص مبقاش ليها مكان في الفريق بعد الإحلال و التجديد الي سكالوني عمله في الفرقة الي لعبت كأس العالم ٢٠١٨ .. 

وجوه جديدة إنضمت للمنتخب زي دي بول ، باريديس ، لاوتارو مارتينيز ، مولينا و روميرو و غيرهم ، مكانوش أقوي اسامي لكنهم كانوا بيلعبوا لهدف واحد و هو فوز الأرجنتين بالبطولات و كمان مساعدة ميسي في تحقيق حلمه علي المستوي الدولي .. 

ملامح الأرجنتين مع سكالوني بدأت تظهر ، فريق قوي بيلعبوا كأنهم لاعب واعد و أهم ما يميزه هو الروح و الإصرار .. لاعيبة وجود جديدة عايزين يثبتوا نفسهم بالإضافة للاعيبة الجيل القديم زي ميسي ، أوتاميندي ودي ماريا ..

في كوبا أمريكا ٢٠٢١ الي برضو اتلعبت في البرازيل ، و في نص النهائي، الأرجنتين لعبت مباراة قوية ضد كولومبيا و بعد هدف من لاوتارو و لويس دياز بعدها يتعادل و الفريقين يلعبوا ضربات ترجيح و مارتينيز ينجح في التصدي ل ٣ ضربات جزاء و الأرجنتين تتأهل لنهائي تاريخي ضد البرازيل في ملعب الماراكانا

دي بول لاعب خط وسط المنتخب بيلعب كورة طويلة في الدقيقة ٢٢ ل دي ماريا الي بيستغل تقدم ايدرسون حارس البرازيل و بيلعبها لوب و يسجل الهدف الأول لزملاء ميسي .. 

تستمر المباراة مع محاولات كتير من البرازيل لتسجيل التعادل لكن لاعيبة الأرجنتين بتلعب بشجاعة و قوة كبيرة عشان الأرجنتين تكسب لقب مهم و أول بطولة دولية لميسي مع الفريق الأول للأرجنتين .. 

فوز خفف الضغوط علي ميسي بعد انتقادات كبيرة علي المستوي الدولي و ده ساعده في اللعب مع الأرجنتين بهدوء خصوصاً بعدها في مباراة الأرجنتين مع إيطاليا بطل اليورو في كأس ال Finalissima علي ملعب ويمبلي و انتهت بفوز الأرجنتين ٣-٠ .. 

إنجازات كبيرة و متتالية للأرجنتين بعد غياب كبير عن البطولات كان مساهم فيه بشكل كبير ليونيل سكالوني الي بالرغم من قلة خبراته التدريبية لكنه نجح في تكوين فريق قوي بيكسب البرازيل علي أرضه و بيكسب كمان بطل اليورو .. 

سكالوني اترشح لجائزة ذا بيست لأفضل مدرب في السنة لكن مانشيني فاز بيها بس دي كانت مجرد البداية لمدرب كبير ..

استمرت سلسلة عدم الهزيمة لمنتخب الأرجنتين ل ٣٦ مباراة علي التوالي قبل بداية كأس العالم ٢٠٢٢ الي اتلعب في قطر و الي كانت تعتبر فرصة مهمة لميسي للفوز باللقب الي خسره قبل كدة في ٢٠١٤ .. 

تبدأ البطولة بخسارة الأرجنتين من السعودية وسط ذهول الجميع لكن بعدها قي مباراة المكسيك و بولندا الأرجنتين بتفوز في المباراتين و تتصدر المجموعة ب ٦ نقاط في عودة مهمة للفريق ..

في دور ال ١٦ مع أستراليا ، ميسي بيسجل أول هدف ليه في الأدوار الإقصائية في تاريخه في كأس العالم و بعدها ألفاريز بيسجل الهدف التاني و المباراة تبقي أسهل بالرغم من تسجيل استراليا هدف في الدقيقة ٧٧ و بعدها تصدي مهم لمارتينيز في الوقت بدل الضائع لكن الأرجنتين بتتأهل لدور ال ٨ و الأداء في نسق تصاعدي ..

في ربع النهائي ، لعبت الأرجنتين قدام هولندا المنتخب القوي دفاعياً و الي فيه مواهب قوية في الهجوم زي جاكبو مولينا سجل هدف و بأسيست رائع من ميسي و بعدها هدف تاني لميسي من ضربة جزاء

و كل المؤشرات لصعود سهل للأرجنتين لدور نص النهائي لكن و بعد نزول المهاجمين ويجورست و لوك دي يونج ، بدأت هولندا تلعب علي الكور العالية و فعلاً سجلوا هدفين و تنتهي المباراة بتعادل ٢-٢ و يوصلوا الفريقين الوقت الإضافي ..

بدأت الأشواط الإضافية ، و ظهر الأرجنتين بصورة مختلفة عن أواخر الشوط التاني، ظهروا بشكل قيه ثقة و الهدفين الي هولندا سجلتهم مقللتش من تركيز اللاعيبة و ده واضح من شغل سكالوني مع اللاعيبة و التحضير النفسي و فعلاً الأرجنتين كانت أحسن و ضيعوا أهداف كتيرة لكن وصلت المباراة لضربات جزاء .. 

مع تألق معتاد لمارتينيز ، اتأهلت الأرجنتين لنص نهائي بعد الفوز علي هولندا بضربات الجزاء و مواجهة كرواتيا وصيف نسخة ٢٠١٨ و الي كان كسي الأرجنتيني في ٢٠١٨ بنتيجة ٣-٠ .. 

منتخب كرواتيا كسب اليابان و البرازيل و ب أسلوب تقريباً واحد و هو التنظيم الدفاعي القوي و اللعب علي الهجمات المرتدة في ظهر دفاع المنافس لاستغلال المساحات الي هيسيبوها لما يهاجموا ..

و عشان سكالوني مدرب مرن ، فهم أسلوب لعب كرواتيا أثناء تحضيره المباراة و قرر يسيب الاستحواذ لكرواتيا و اللعب بنفس أسلوبهم كنوع من المباغتة و فعلاً نجحت الطريقة و فازت الأرجنتين بنتيجة ٣-٠ و بأداء رائع من كل اللاعيبة، يتأهل الفريق لنهائي تاريخي، هو التاني للأرجنتين بعد نهائي ٢٠١٤ .. 

لعبت الأرجنتين النهائي ضد فرنسا بطل النسخة السابقة من كأس العالم، الي كمان بتلعب بطريقة شبيهة لكرواتيا خصوصاً إن عندها أجنحة سريعة زي مبابي و ديميلي فا بتلعب علي المساحات في دفاع المنافس عشان يستغلها مبابي و ديميلي

سكالوني قرر يغير الأسلوب الي لعب بيه قدام كرواتيا ،و قرر يبدأ بالهجوم ضد فرنسا و يلعب كمان ب دي ماريا الي ملعبش مباراة كرواتيا و جاهز للنهائي و فعلاً دي ماريا لعب جناح شمال عشان يوقف خطورة ديمبلي و يخليه يرجع يدافع مع كوندي ، لكن ده مكنش كفاية و دي ماريا ساهم في هدفين، واحد من ضربة جزاء حصل عليها و التاني سجله بنفسه في شوط أول من طرف واحد لصالح الأرجنتين ..

سكالوني كان بيواجه مبابي عن طريق ٣ لاعيبة بيبقوا معاه: مولينا الظهير ، روميرو يغطي وراه و كمان دي بول الي لعب مباراة كبيرة و فعلاً مبابي معظم وقت المباراة مظهرش بخطورة لحد الدقيقة ٨٠ و من هنا الموضوع اختلف شوية 

سيطرة بالطول و العرض من الأرجنتين في أول ٨٠ دقيقة لكن فرنسا بتسجل هدفين عن طريق مبابي بيوصلوا بالمباراة لأشواط إضافية بعد خطأين من الأرجنتين، واحد من سكالوني الي طلع دي ماريا مصدر خطورة الفريق الي كان مفروض تغييره يتأخر شوية، لأن ديشامب كان نّزل كومان في الجبهة الي فيها ديماريا .. 

كومان تألق بشكل كبير و كان وجود دي ماريا هيخليه يرجع يدافع شوية زي ديمبلي لكن خروج ديماريا ادي حرية لكومان 

و الخطأ التاني كان من أوتاميندي في ضربة الجزاء الي سجل منها مبابي الهدف الأول الي رّجع فرنسا للمباراة لكن الأشواط الإضافية انتهت بردو بتعادل ٣-٣ بعد تسجيل ميسي هدف و مبابي بيتعادل تاني بضربة جزاء بردو ..

في ضربات الجزاء، مارتينيز تصدي لكورة و كورة تانية ضاعت مقابل تسديد الأرجنتين ٤ ضربات بنجاح و الأرجنتين تُعلن بطلاً لكأس العالم للمرة التالتة في تاريخها و الأولي لميسي بعد رحلة دولية طويلة .. 

https://www.youtube.com/watch?v=u_mWUiwIpsU

ميسي افضل لاعب في البطولة ، إنزو فيرنانديز أفضل لاعب صاعد و مارتينيز أفضل حارس لكن لما تبقي محتار مين أفضل لاعب و يبقي معظمهم كويسين يبقي كلمة السر هو ليونيل سكالوني، المدرب الي غّير شكل الأرجنتين من فريق بيطلع من دور ال ١٦ في كأس العالم لبطل العالم و قبلها فوز ببطولتين كلها أرقام تخلي سكالوني واحد من أهم - إن لم يكن أهم - مدرب في تاريخ الأرجنتين خصوصاً و إنه أول مدرب يفوز ب الكوبا أمريكا و كأس العالم ..

سكالوني مدرب واعد و أهم ما يميزه إنه مرن في أفكاره و متميز في تحضير المباريات و تحليل أداء المنافس و كمان بيعرف يعمل تحضير نفسي و ينشر الروح و العزيمة في الفريق الي متحدين لتحقيق هدف واحد و هو فوز بلادهم الأرجنتين 🇦🇷