كل ما تريد معرفته عن البرازيلي إندريك مهاجم ريال مدريد الجديد

رسمياً .. ريال مدريد يعلن التعاقد مع الجوهرة البرازيلية اندريك المهاجم الشاب بس مين هو اندريك؟

اندريك من مدينة برازيليا عاصمة البرازيل ، و كان بيلعب كرة و هو عنده ٤ سنين و من وقتها و عائلة اندريك بتنزله فيديوهات علي اليوتيوب عشان يدوروا علي نادي يلعب فيه

 

قبل ما يلعب في بالميراس، اتمرن مع أندية كورينثيانز و ساو باولو لكن موصلش لاتفاق معاهم و في الفترة دي و هو عنده ١١ سنة ، نادي بالميراس قرر يتعاقد مع اللاعب الشاب

منسق كرة القدم للشباب في بالميراس جواو باولو قال إنه اتفرج علي فيديو لاندريك و هو بيلعب و عجبه طريقه لعبة و مهاراته فا وافق علي التعاقد معاه

و فعلاً من اللحظة الأولي ليه مع النادي أبهر الناس كلها خصوصاً لما سجل هدف رائع من Double Kick في أول مباراة ليه ضد فريق سانتوس تحت ١١ سنة و بعدها في مباراة الإياب و في حضور ٢٢ الف متفرج في الملعب، سجل هدف الفوز بالبطولة

جواو باولو بيكمل كلامه عن اندريك و بيقول إنه عنده العقلية المحترفة المطلوبة للاعب كرة القدم بالإضافة لاهتمامه بالوزن و كل التفاصيل الصغيرة الي تخليه لاعب محترف

في ٥ سنين لاندريك مع بالميراس ، لعب ١٦٩ مباراة في الفئات السنية المختلفة و سجل ١٦٥ هدف حسب ويكيبيديا و لعب في بطولة كأس ساو باولو للناشئين و سجل ٧ أهداف في ٧ مباريات و ساهم في فوز فريقه بالبطولة و تم اختياره أفضل لاعب في البطولة و كمان سجل ٥ أهداف في ٤ مباريات مع منتخب البرازيل تحت ١٦ سنة 

عشان كدة أندية أوروبية كتير بدأت تتابع الموهبة البرازيلية الصاعدة بقوة منهم برشلونة، أرسنال،ليفربول ، مانشستر سيتي بنفيكا و ريال مدريد

بداية اندريك مع الفريق الأول كانت في ٦ أكتوبر ٢٠٢٢ لما نزل كبديل في الشوط التاني في مباراة ضد فريق كورتيبا في الدوري البرازيلي عشان يبقي أصغر لاعب في تاريخ بالميراس يشارك في مباراة رسمية ب ١٦ سنة و شهرين و كمان أصغر لاعب يسجل هدف و كمان يعتبر اللاعب الوحيد الي توج ببطولات في كل مرحلة سنية مختلفة مع النادي

في الموسم الحالي ، اندريك لعب لحد دلوقتي مع بالميراس ٢١ مباراة سجل ١٢ هدف و عمل أسيست و بشكل عام توج مع الفريق في كل المستويات الفريق الأول و الناشئين ب ٦ بطولات بالإضافة لبطولة مع منتخب البرازيل تحت ١٦ سنة

اندريك قيمته التسويقية الحالية هي ٢٠ مليون و ده رقم كبير بالنسبة للاعب عنده ١٦ سنة 

في ١٥ ديسمبر ٢٠٢٢ ، نادي ريال مدريد يعلن التعاقد مع المهاجم البرازيلي الشاب اندريك لاعب بالميراس في صفقة قياسية قيمتها ٣٥ مليون مع ٢٥ مليون إضافات و ١٢ مليون ضرائب يعني قيمة الصفقة توصل ل ٧٢ مليون عشان يبقي اندريك رابع أغلي صفقة للاعب صاعد بعد مبابي ، جواو فيليكس و دي ليخت و كمان يبقي تاني أغلي لاعب برازيلي في التاريخ بعد نيمار و سابع أغلي صفقة في تاريخ ريال مدريد .. 

جاري لينيكير قال عنه إنه شايف فيه موهبة صاعدة بقوة في عالم كرة القدم .. فريدريكو بينا المدير التنفيذي في وكالة TFM الي بتمثل فينيسيوس، و جابريل مارتينلي قال إنه مش فاكر لاعب في نفس سن إندريك علي مر التاريخ الحديث بيعمل الي اندريك عمله

لما اندريك اتسال إن الناس بتشبهه ب روماريو و رونالدو الظاهرة قال إنه يتمني يوصل للي الاعيبة دول حققوه في تاريخ البرازيل و الكرة بشكل عام لكنه عايز يعمل شخصية مستقلة لنفسه بعيدة عن أي لاعب تاني

و لما اتسأل عن كريستيانو رونالدو و إنه وصفه قبل كدة بقدوته في الكرة قال إنه معجب باصرار كريستيانو و اخلاصه في الكرة و أنه دائما عايز يبقي أحسن