مارسيلو بيلسا كما لم تعرفه من قبل 🇦🇷

 مارسيلو بيلسا كان بيلعب مدافع في فريق نيولز اولد بويز لكنه اعتزل في سن ال ٢٥ عشان يركز علي مجال التدريب

أول فريق دربه كان نيولز اولد بويز في ١٩٩٠ و فاز ساعتها بكذا بطولة محلية في الأرجنتين و وصل لنهائي كأس ال ليبارتادوريس و خسر من ساو باولو

في ١٩٩٨ ، بيلسا درب فريق إسبانيول لكنه مكملش كتير بعد ما جاله عرض من منتخب الارجنتين كبديل للمدرب دانيل باساريلا ، في كوبا امريكا ٩٩ الأرجنتين خسرت ٣ صفر من كولومبيا لما مارتن باليرمو ضيع ٣ ضربات جزاء و كمان بيلسا اتطرد

في كأس العالم ٢٠٠٢ الأرجنتين خرجت من الدور الأول في البطولة الي بيتقال إنه خد معاه أكثر من ١٨٠٠ شريط فيديو لتحليل المنافسين و لما حس إنهم مش كفاية طلب ٢٠٠ تانيين

 و وصلوا تاني لنهائي كوبا امريكا ٢٠٠٤ لكن خسروا بردو قبل ما يفوزوا بالميدالية الذهبية ل اولمبياد ٢٠٠٤ لأول مرة في تاريخ الدولة قبل ما بيلسا يقدم استقالته من تدريب الأرجنتين عشان يدرب بعدها منتخب تشيلي

بداية بيلسا مع تشيلي كانت سيئة لما خسروا من باراغواي و برازيل ٣ صفر لكن النتاىج بدأت تتحسن في اكتوبر ٢٠٠٨ لما تشيلي مع بيلسا فازت علي الأرجنتين ١ صفر للمرة الأولى عشان تشيلي تتأهل لكاس العالم بعد غياب نسختين و ده الي خلي بيلسا ليه شعبية كبيرة في البلد

تشيلي وصلت دور ال ١٦ لكن خرجت مم البرازيل و كان فيه إشاعات عن رحيل بيلسا لكن جمهور المنتخب رفضوا رحيله و فعلاً بيلسا كمل لكنه هدد إنه هيمشي لو جورج سيجوفيا تم اختياره كرئيس جديد للاتحاد التشيلي و فعلاً ده حصل و بيلسا بينفذ كلامه و بيقدم استقالته في فبراير ٢٠١١

بيلسا بيدرب اتلتيك بلباو و بيعمل بداية قوية و بيتصدر المجموعة في الدوري الأوروبي و يفوز علي لوكوموتيف موسكو فب دور ال ٣٢ مكرر و كمان في مباراة كبيرة بيفوز عاي مانشستر يونايتد في دور ال ١٦ بفوز رايح جي عليهم في الذهاب و الإياب و في دور ال ٨ الفريق بيفوز عاي شالكة بالرغم من تألق الإسباني راؤول

بالرغم من خسارة بلباو لذهاب نص النهائي من سبورتنج لشبونه لكنهم كسبوا الإياب بهدف فرناندو يورنتي في الدقيقة ٨٨ و يوصلوا للنهائي ضد أتليتكو مدريد في نهائي إسباني خالص لكنهم خسروه ٣ صفر و كمان بعدها في مايو ٢٠١٢ بيخسروا نهائي كأس الملك من برشلونة ٣ صفر و في نهاية الموسم الفريق مع بيلسا بينهي الدوري في المركز ال ١٢ و ده الي خلي بيلسا ميكملش مع الفريق بالرغم من نجاحه الأوروبي عشان في مايو ٢٠١٤ ، رئيس نادي مارسيليا يعلن تعيين مارسيلو بيلسا مدربا للفريق 

مارسيليا مع بيلسا كانوا أبطال الدور الأول و مع نهاية الموسم أنهوا الدوري في المركز الرابع لكن بعد خسارة مباراة الافتتاح في الموسم الجديد ، بيقال بيلسا من تدريب الفريق

في يوليو ٢٠١٦ ، بيلسا درب نادي لاتسيو الإيطالي لكن بعد ٣ أيام بس بيمشي من النادي و بيلسا بيقول بعدها انه مشي عشان النادي مكنش جاهز يتعاقد مع اللاعيبة الي طلبها عشان يسيب الفريق و يدرب نادي ليل

بيلسا مع ليل نزل ب معدل الأعمار في الفريق و بيع اللاعيبة الكبتر في الفريق زي وانياما ، ايدر و مافوبا و التعاقد مع لاعيبة صغيرين زي نيكولاس بيبي ، تياجو مينديز ، مالكويت و لويز اراوخو لكن في نوفمبر ٢٠١٤ بيتم ايقاف بيلسا ١٣ مباراة عشان نادي ليل بيعلن رحيله عن تدريب الفريق

في ١٥ يونيو ٢٠١٨ ، بيلسا بيتولي تدريب نادي ليدز يونايتد الإنجليزي و بقي أغلي مدرب في تاريخ النادي .. بيلسا فاز ب اول ٣ مباريات ليه مع الفريق عشان يبقي أول مدرب في تاريخ النادي يعمل كدة من سنة ٧٤ و بيلسا كما البداية القوية و فاز باول ٦ مباريات مع الفريق عشان يتم اختياره مدرب الشهر في الدوري الدرجة الثانية

ليدز كان لسه بينافس عاي الصعود المباشر للدوري الممتاز لكن مع إصابات كتير ضربت الفريق ، بيلسا صعد ناشئين كتير لتعويض المصابين وصل عددهم ل ١٠ لاعيبة تحت ٢١ سنة لعبوا مع بيلسا في الفريق الأول

في نص نهائي الملحق الفريق لعب مع ديربي كاونتي تحت قيادة فرانك لامبارد لكن بيخسروا ٤-٣ بنتيجة المباراتين و بيلسا بعدها بيقول ان اكبر سبب ان ليدز مصعدتش الدوري ان اللاعيبة بتضيع فرص كتير و يعتبر ليدز يونايتد من اقل الفريق تسجبلا لأهداف مقارنة بباقي الفريق الي بتنافس

اعترف مارسيلو بيلسا، إنه بعت جاسوس لتدريبات فريق ديربي كاونتي قبل المباراة الي كانت بينهم و الي فاز بيها ليدز في النهاية و قال إن إدارة النادي متعرفش حاجة عن الموضوع و إنه مستعد لتحمل كل العقوبات و عشان كدة رابطة الدوري أعلنت أنها هتحقق في الموضوع و لما وصلوا للحقيقة و إنه حصل فعلاً ، وقعت غرامة مالية علي ليدو يونايتد ل ٢٠٠ الف جنية إسترليني بيلسا طلب يدفعها هو و كمان الرابطة عملت قانون يمنع اي فريق يحضر تدريبات الفريق المنافس ليه قبل المباراة بينهم ب ٧٢ ساعة

بيلسا بعدها بيجدد عقده مع الفريق و في الموسم الجديد بيتعاقد مع هيلدر كوستا ، بن وايت ، جارك هاريسون ، موسلير ، ايدي نكيتيا علي سبيل الإعارة في محاولة للصعود للدوري الإنجليزي و فعلاً الفريق مع نهاية الموسم صعد للدوري بعد ما فاز ب كأس الدرجة التانية ٢٠١٩/٢٠٢٠ قبل نهاية الدوري ب مباراتين و بعد صعود الفريق ، فيه شارع في مدينة ليدز اتسمي ب اسم بيلسا و كمان تم اختياره أفضل مدرب في الموسم

في أبريل ٢٠١٩ ، لما ليدز لعب ضد أستون فيلا شهدت المباراة لقطة غريبة لما فريق ليدز سجل هدف في الدقيقة ٧٢ بعد ما كان فيه لاعب من أستون فيلا مصاب و ده الي خلي لاعيبة أستون فيلا يضايقوا و حصل بين اللاعيبة مشادة كبيرة عشان كدة بيلسا اتدخل و طلب من لاعيبة فريقه يسيبوا الكرة للاعيبة أستون فيلا عشان يسجلوا هدف التعادل و فعلاً حصل في لقطة أظهرت روح رياضية كبيرة من المدرب الأرجنتيني

١٢ سبتمبر ٢٠٢٠ ، كانت أول مباراة ل بيلسا مع الفريق في الدوري الممتاز و كانت ضد بطل النسخة السابقة ليفربول و لعب ليدز مباراة كبيرة خسروا ٤-٣ في الانفيلد لكن فازوا ب إشادة الجميع ك رسالة ان ليدز هيبقي منافس قوي لكل الفريق مش فريق صاعد جي يهبط تاني و عشان كدة بيلسا تم اختياره تالت أفضل مدرب في العالم في جائزة ذا بيست من الفيفا

ليدز بعدها بيفوز علي نيوكاسل ٥-٢ و خسر ٦-٢ من مانشستر يونايتد قبل ما يفوز ٥-٠ علي ويست بروميتش

ليدز مع بيلسا بقي ليه شكل واضح فريق بيسجل أهداف كتير و بيدخل فيه أهداف كتير فريق بيلعب للمتعة بس و مش بيهموا فريق كبير او صغير

في اخر ١١ مباراة في الدوري ليدز خسرت منهم مباراة واحدة بس و عملت مباريات قوية مع الفرق الكبيرة في الدوري منها تعادل مع مانشستر يونايتد تشيلسي و ليفربول و فوز عاي توتنهام و مانشستر سيتي عشان ليدز تنهي أول موسم ليهم في الدوري مع بيلسا في المركز التاسع وسط إشادة الكل بعد ما بقوا أكتر فريق من ٢٠ سنة يحقق نقاط و يسجل أهداف في أول موسم ليه بعد الصعود 

في ٢٧ فبراير ٢٠٢٢ ، ليدز بيعلن رحيل بيلسا عن تدريب الفريق بعد نتائج سيئة في الموسم الجديد ٤ خسارات ورا بعض و استقبلت شباك الفريق ١٧ هدف و في المركز ال ١٦ لكن بالرغم من كدة جمهور ليدز كان لسه بيهتف بإسم بيلسا

بيلسا جاله عروض لتدريب أندية و منتخبات كتير و اهمهم كان ريال مدريد في ٢٠٠٤ و بعدها إنتر ميلان و كمان في الفترة الي فاتت من منتخب الاورغواي و ايفرتون

مارسيلو بيلسا طول مشواره فاز ب ٦ بطولات اهمهم دوري الدرجة التانية مع ليدز و الميدالية الذهبية في أولمبياد ٢٠٠٤ مع الأرجنتين و كان وصيف الكوبا أمريكا في ٢٠٠٤ .. 

بيلسا تم اختياره أفضل مدرب في أمريكا الجنوبية في ٢٠٠٩ ، و تالت أفضل مدرب في العالم من فيفا في ٢٠٢٠ و صاحب جائزة اللعب النظيف من فيفا في ٢٠١٩

مارسيلو بيلسا كان ليه تأثير كبير علي لاعيبة دربهم بقوا مدربين بعد كدة زي ماوريسيو بوتشتينيو، دييجو سيميوني و مارسيلو جاياردو

صحفي من بي بب سي في أمريكا الجنوبية بيحكي ان لما بيلسا كان بيدرب منتخب الارجنتين ، في مرة في التدريبات ادي لكل لاعب ورقة و قلم و طلب منهم يختاروا الفريق يلعب ب ٤ في الدفاع ولا ٣ و لقي معظم اللاعيبة كاتبين ٤ لكنهم قالهم هنلعب ب ٣ بردو و أنهي التمرين و فعلاً حافظ عاي اللعب بطريقته

بيلسا معروف عنه بيتفرج علي فيديوهات و تحليلات كتيرة في الكرة و يفضل يحلل أداء كل لاعب بالأرقام و أحدث الادوات و كمان تحضيره المباريات بيبقي قوي جدا و عشان كدة صحفي انجليزي وصفه بمكتبة متنقلة في كرة القدم

المهاجم جابريل باتيستوتا قال ان بيلسا علمه إزاي يتدرب حتي لو فيه مطرة و إنه علمه كل حاجة في الكرة .. فرناندو يورنتي قال ان بيلسا في البداية يبان قوي و ممكن يضايقك لكنه في الآخر عبقري

اليكسيس سانشيز بيقول إنه اتعلم كتير من بيلسا و خافي مارتينيز لاعب البايرن بيقول ان بيلسا علمه كتير علمه كمان إزاي يلعب مدافع و هو كان نص ملعب و لازم كل لاعب يلعب معاه علي الاقل مرة واحدة

الكاتب تيم ريتش كان مهتم بمسيرة مارسيلو بيلسا لدرجة أنه ألف كتاب عنه و جزء من كلامه عن محاولة لتفسير سبب القعدة الشهيرة ل بيلسا بالشكل ده

و بيقول ريتش ان بيلسا مكنش بيقعد كدة لحد ما درب مارسيليا و ساعتها المقاعد المخصصة الجهاز الغني و الاحتياطي كانت واطية شوية و ده مكنش بيساعد بيلسا في قراءة المباراة بشكل كويس عشان كدة كان بيفضل يقعد علي أي حاجة عالية زي صندوق التلج عشان يعرف يوجه اللاعيبة في الملعب و كمان يزود الحماس عند اللاعيبة 

قبل نهاية الكلام عن مارسيلو بيلسا ، بيب غوارديولا وصف بيلسا بالمدرب الأفضل و إن أي حد بيشتغل معاه بيبقي لاعب أفضل و يخلي كمان الفرق الي بيدربها اقوي و أحسن