طرق اللعب الحديثة في كرة القدم

 تعددت طرق اللعب و اختلاف مراكز اللاعيبة فيها ،و اختلفت كمان آراء الناس عليها و هل كل طريقة فيهم تتصنف دفاعية ولا هجومية و هل تناسب كل الفرق ولا لا ؟

يمكن في مصر طريقة ال ٤٢٣١ منتشرة بشكل كبير لكن كل ما أي مدرب مصري يغير و يلعب بطريقة ٤٣٣ او ٣٤٣ مثلاً، الجمهور يعترض و يقول دي طريقة دفاعية و مش مناسبة لفريق كبير زي الأهلي مثلاً أو الزمالك و إنه دائمًا لازم يهاجم علي طول عشان كدة مينفعش يلعب بطريقة دفاعية زي كدة .. لكن خلينا نسأل الأول هل الطرق دي طرق دفاعية فعلاً ؟

أولا : طريقة ال 433

 .. الفريق لما يعتمد علي طريقة لعب 433 , ده معناه إنه بيلعب ب ٣ في نص الملعب و بدل ما يكون فيه لاعب واحد صانع ألعاب رقم ١٠ بيتحول ل اتنين لاعيبة رقم ٨ يقوموا بنفس دوره الهجومي و زيادة عليه أدوار دفاعية بيقوموا بيها .. أشهر الفرق الأوروبية بتلعب ٤٣٣ زي برشلونة ، السيتي ، ريال مدريد ، ليفربول و غيرهم .. 

في حالة الهجوم الخطة بتتحول ل ٤١٥ .. اللاعب رقم ٦ بيفضل في نص الملعب واقف قدام خط الدفاع يأمن الفريق في حالة المرتدات و قدامه ٥ لاعيبة من علي اليمين الوينج و جنبه لاعب رقم ٨ و جنبه المهاجم و لاعب رقم ٨ التاني و الناحية التانية الوينج الشمال .. ال ٢ لاعيبة رقم ٨ بيلعبوا في ال Half Spaces ما بين الوينج و مدافع الخصم ..

و يقدروا كمان يكملوا في ال ١٨ كمهاجم تاني لما الكورة تيجي من الناحية العكسية ، و كمان بيقوم بدور الرجل التالت او الرجل الحر عشان يعمل تفوق عددي و يعمل مثلث مع الوينج و الباك في كل ناحية .. ده غير وجود ٢ لاعيبة رقم ٨ علي ال ١٨ بيزود فرصة حصول الفريق علي الكور التانية و كثرة التسديدات ..

ثانيا : طريقة ال 343

بالنسبة بقي ل ٣٤٣ ،، الفريق بيلعب ب ٣ في الخط الدفاعي عشان يقفل العمق و يأمن دفاعة بشكل كبير و كمان يدي حرية للباكات في الهجوم و تحريرهم بعض الشئ من الواجبات الدفاعية ..

بشكل عام ، اللعب ب ٣ لاعبين سواء في الخط الدفاعي أو في نص الملعب ، دي مش طرق دفاعية لكنها بس بتدي أمان دفاعي في حالة المرتدات و في المقابل بتعمل كثافة هجومية كبيرة أكتر حتي من ٤٢٣١ الي بالمناسبة بتختفي تدريجياً من العالم و ده لأسباب كتير منها وجود ٢ لاعيبة بس في نص الملعب

 الفريق الي بيستخدم طريقة ال ٤٢٣١ لما يلاعب فريق يلعب ٤٣٣ او ٣٥٢ بيخسر الاستحواذ في نص الملعب و بيبقي رد الفعل لأن زي ما قلنا اللعب ب ٣ في نص الملعب بيساعد علي الاستحواذ و السيطرة علي اللعب طالما ال ٣ دول كل واحد بشكل مختلف و مش بيلعبوا علي خط واحد ..

كمان ٤٢٣١ استخدامها في العالم بيقل بسبب بداية عدم الإعتماد بشكل كبير علي اللاعب رقم ١٠ الكلاسيكي الي مش بيدافع و بيستني الكرة تجيله و بيلعب بحرية في الملعب و استبداله ب ٢ لاعيبة رقم ٨ يبقوا عندهم نشاط و بيدافعوا و بيهاجموا في نفس الوقت و بقي ليهم إسم في الكرة الحديثة و هو Box to Box .. 

اللعب ب ٣ في الدفاع او ٣ في نص الملعب دول مش معناهم طرق دفاعية لا كل طريقة بتختلف حسب توظيف اللاعيبة في الملعب .. مفيش طريقة دفاعية بحت أو هجومية بحت ، بتختلف بس حسب تنفيذها ..